كلوا كرمال الأهلي

السلام عليكم و رحمة الله و بركاته , سأحكي لكم اليوم قصة غريبة عجيبة عن مجموعة من الأشخاص الذين استيقظوا صباح الجمعة و منهم من لم ينم أبدا , حملوا الرايات الحمراء و لبسوا الأحمر و شدوا الى ساحة سعد الله الجابري في حلب ........
( وين يا شباب ؟ و الله على حماة ..... و شو بدكن تعكلوا بحماة ؟ بدنا نتابع مباراة الاتحاد و الطليعة ...... الله يهديكن و يصلحكن اش بدكن بالمباراة كلهم 22 لاعب عم يركدوا ورا طابة و بدكن تروحوا على حماة !!!!!!!!!!!! حسبي الله و نعم الوكيل على هالجيل ) هذه كانت كلمات أبي العزيز عندما أتى الشباب لعندي منشان نروح عالساحة , المهم........ رحنا عالساحة و استنينا و انتظرنا و رجعنا استنينا و صبرنا لحتى اجا أول باص , تعبى الباص بجماعته لغسان أفندي و راح , ضلينا نستنى لحتى وصلوا خمسة أو ستة باصات ورا بعضهن , الله وفقنا و قدرنا نطلع بواحد منهن , مشينا و وصلنا على ادلب و نزلنا أكلنا شعيبيات و عبينا مي بالخزان ( بطونتنا ) و مشينا و وصلنا على المعرة..... نزلنا صلينا الجمعة و الخطيب قلبها خطبة تكنولوجية و هو عم يحكي عالدش و الموبايل و الاوربي ....صلينا و الحمد لله و شدينا ...... وصلنا على حماة .... نزلنا عند النواعير و تمشينا بشوارع حماة و نحن رايحين عالملعب عم ننده بإسم الأهلي و بإسم حلب و عم نسمع مسبة من هون و حركة من ايد شي واحد طلعاوي من هون و كلو كرمال الأهلي , وصلنا عالملعب لنفاجأ بأن الدخول بمصاري عكس ما كان يشاع عن الدخول المجاني .. دفعنا و وقفنا عالدور و سكروا الأبواب و جبنا العميد واسطة لحتى فتحوا الأبواب و تكسروا اجرينا ونحن واقفين عالدور و كلو كرمال الأهلي ...... دخلنا عالملعب و هون كان أحلى شي بالرحلة كلها , الجمهور عم يشجع الأهلي بصوت واحد ,بلشت المباراة و ضلينا طول المباراة واقفين على اجرينا اللي كانت رح تطق و ما عاد تقدر تشيلنا و كلو كرمال الأهلي حبنا الأبدي
و عينكن تشوفوا لما حط الفنان ( اوتو سوبر جنط ) الكول التاني , جنينا و فرحنا و أكلنا حجر و قناني تنك من جمهور الطليعة و كلو كرمال الأهلي....... خلصت المباراة و يا ريتها ما خلصت ...... الحموية محاصرين الملعب و عم يشلفوا علينا الحجر و عم يعبر عن أصله ...... انصاب كم واحد من الجمهور و كلو بيهون كرمال الأهلي ...... دخلنا على أرضية الملعب لحتى نطلع من الطرف التاني و يا ريتنا ما طلعنا من الطرف التاني , لسا ما طلعنا من هون و هجموا الطلعاوية من هون فاضطرت شرطتنا الموقرة لإطلاق القنابل المسيلة للدموع التي أصابتنا كلنا و كلو كرمال الأهلي ... فرقت الشرطة جمهور الطليعة و طلعنا عالشارع بدنا شي سيارة تشيلنا للدوار لحتى أخدنا تكسي و وصلنا للدوار و ما في ولا باص ..... عصبنا و انحرينا و كلو كرمال الأهلي .... اتصلنا بأبو عباية فقال لنا انو في اخر باص هو عند النواعير , رحنا لعند النواعير و شفنا الباص , المسؤولين على الباص رفضوا يطالعونا بحجة انو لهدا الباص ركابه مع انو كان فاضي تقريبا ...... تدخل العقلاء و قدرنا نطلع ..... و نحن عالطريق غنينا و فرحنا و هيصنا فرحا بالفوز الغالي بعد يوم عصيب على كل جمهور الإتحاد من حيث المشاكل مع الطلعاوية و مشاكل الباصات ........ و في الختام أبارك لكل الأهلاوية الفوز الغالي و عقبال بطولة الدوري و الكأس , أقول قولي هذا و أستغفر الله العظيم لي و لكم فيا فوز المستغفرين استغفوا الله .......... أقم الصلاة!!!!!!!!!!!!!


--------------------------------

وتوتة توتة خلصت الحكية


و عقبال الدوري